بسم الله الرحمن الرحيم

الحمد لله وكفى وصلاة وسلاماً على عباده الذين إصطفى

اللهم لك الحمد كله ولك الملك كله وإليك يرجع الأمر كله

تباركت ربنا وتعاليت والخير كل الخير فى يديك والشر ليس إليك

نحن بك واليك تباركت ربنا وتعاليت نستغفرك ونتوب إليك

ثم أما بعد :-

أخوانى فى الله

واحد محبوس فى سجن ، بس السجن بابه من ذهب

الحوائط من ذهب والسقف من ذهب

إبتدي ينبهر بالسجن الى هو فيه ويقول الله !

قد إيه الحيطان جميلة .. قد إيه الباب الدهبى داه جميل

وابتدا يفكر ازاى يذوق المكان ويزخرف المكان الى هو فيه

هنا لوحة ، وهنا سرير ، وهنا تسريحة

ومش واخد باله أن فيه طربيزة فى زاوية السجن ، عليها مفتاح خروجه من السجن !

أهو داه يا اخوانى حال الاغانى معانا

الأغانى بتوضح لك مشكلتك ، بتزين لك مشكلتك

بتقولك قد إيه انتا مشكلتك كبيرة

بتقولك قد إيه أن الهم الى انتا فيه عامل زى جبل

أغلب الأغانى الناس بتحبها عشان بتوضح الى الناس مش قادرة توضحه

لكن يا أخوانى عمركوا شوفتوا أغنية قالتلك أخرة الحزن والهم الى انتا فيه داه ايه ؟

عمركوا شوفتوا أغنية بتقولكوا لو انتوا جواكوا جبال هموم هتنسفهالكوا ازاى ؟!

ياجماعة أغلب الأغانى ومش عاوز أبالغ لو قولت 99% من الأغانى بتقولكوا المشكلة ايه بس مابتقولش الحل

الأغانى دايما بتبقا سبب فى الهم والحزن ، لانها بتقولك قد ايه انتا حزين ، قد ايه انتا مكسور ، قد ايه كانت خسرتك

قد إيه الفرحة مابتكملش ، قد ايه الدنيا مابتدومش خيرها على حد ، قد ايه انتا قلبك اتكسر ، قد ايه خسرت ناس .

اخوانى !

كتاب ربنا هو الحل ..

القران بيقولك مشاكل الناس الى كانت قبلك ايه ، ومشكلتك الحالية ايه ، والمشكلة الى ممكن تواجها فى المستقبل هتكون ايه ..

القران بيقولك انتا قد ايه مهموم ومتضايق ، ومع ذلك بيديك مفتاح خروجك من السجن .

القران بيطمنك للى جاى ..

القران بيقولك ماتقلقش ، ربنا هيكفيك شر الى جاى وهيريحك من الى راح ..

( لكى لا تأسوا على مافاتكم ولتفرحوا بما أتاكم )

ربنا يطمنك ، ربنا يبقولك الى جاى احسن اطمن ..

ياجماعة !

الواحد لما عربيته بتبوظ بيروح للميكانيكى ، لما خشب فى البيت بيبوظ بيجيب النجار ، لما حاجة ليها علاقة بالسباكة تبوظ بتجيب السباك

والله المثل الأعلى ..

احنا ليه لما بنتعب مابنجريش على ربنا قبل أى حد !

احنا ليه أول مابنحس بتعب نفسى بنجرى على ناس وعلى دكاترة نفسيين مع أن ربنا قال (و لكن أكثر الناس لا يعلمون)

الناس مش حاسه بيك ، أبسط مافيها هيتقالك معلش !

أجرى على ربنا ، هو الى خلقك وهو عارف ايه الى بيتعبك ، وهو الى عارف همومك قد ايه

وهو الى مش هيستعصى عليه يحللك مشكلة .

إن الدنيا تعدل عند الله جناح بعوضة ..

فأنتا ايه فجناح البعوضة ، فمشكلة ايه دى الى هتكون عندك !!!

أخوانى !

طريق ربنا هو الحل ..

انا أعرف واحد يوم مايبقا تعبان نفسياً او عنده مشكلة ..

يقوم يتوضا ويجرى على القران يسم الله !!

ويفتح صفحة عشوائية من القران ، ويقراها بتمعن ، فبيطلع منها برسالة لربنا وبتكون سبب للفرج ..

ثقة فى الله ..

لازم يوم مانتعب نتعود نجرى على ربنا ..

كان صلى الله عليه وسلم إذا حزبه أمر فزع إلى الضلاة ..

مش إلى أم المؤمنين رضى الله عنها ، مش لأبو بكر رضى الله عنه ، مش لمخلوق لله ..

فى النهاية ..

لازم كلنا نعرف ان مهما البشر عملوا هيجى عليك وقت هتستكفى منهم ، هتحس انهم لابيقدموا ولا بيأخروا

لو أنتا مسنود على مسئول ، او حد مهم هيجى يوم هيقفل الباب فى وشك ..

لو أنتا فرحان بمركزك وبلمة الناس حوليك ، هيجى عليك وقت هتعرف فيها ان كل دول لايغنوا عنك من الله شيئاً ..

فلازم يكون من اللحظة دى سكتنا هى ربنا ، هدفنا الاسمى هو رضا ربنا ، الفزع إلى ربنا ، لانه الوحيد الى عارف ازاى هيجبر بخاطرك

سبحانك اللهم وبحمدك أشهد أن لا إله إلا أنت أستغفرك وأتوب إليك ..

وجزاكم الله خيراً .

ساعد في نشر والارتقاء بنا عبر مشاركة رأيك في الفيس بوك